Gin-anunsyo sang gobyerno sang Pilipinas nga buligan sini nga mapapauli ang 63 ka mga Pilipino halin sa Haiti bangud sa naga-ibwal nga kinagamo nga tuga sang mga gang sa amo nga pungsod.
Nakasaad ini sa joint statement sang Department of Foreign Affairs (DFA), Department of Migrant Workers (DMW), kag Overseas Workers Welfare Administration (OWWA) nga ginpaguwa kagab-i, Marso 17.
Ang repatriation ang kasunod sang pag-apruba ni DFA Secretary Enrique Manalo sa rekomendasyon nga ideklarar ang Alert Level 3 ukon ang voluntary repatriation sang Filipinos sa amo nga Caribbean island nation.
115 ka mga Pinoy ang nagatinir sa amo nga pungsod apang ginahulat pa sang Pilipinas ang kumpirmasyon sang iban kun magapauli man sila sa Pilipinas.
Ginapangitaan man sang paagi kun paano mapapauli ang mga Pinoy bangud nga wala sang flights nga pahalin sa amo nga pungsod kag wala man gina-engganyo ang land travel pakadto sa kapital nga syudad sa Port-au-Prince bangud sa posible pagpang-atake sang mga gang.
Ang pinaka-posible nga option subong amo nga charter flight nga amo man ang ginahimo sang Estados Unidos sang Amerika sa ila pagpapauli sa mga Amerikano nga naipit man sa kinagamo.
Sa subong, suno sa DMW, wala sang na-report nga Pilipino nga nasamaran ukon apektado sang security crisis sa amo nga lugar.
Una na nga ginpahayag ni Father Adrian Zambo Atonducan, Bombo International Correspondent sa Haiti, nga may iban subong nga makasarang pa kag naga-amat-amat naman sa pagtipon sang mga pagkaon, bulong, tubig, kag iban pa nga kinahanglanon pananglitan maglala pa ang gang violence.
Pila ka semana na halin sang naglala pa ang sitwasyon sa seguridad sa amo nga pungsod kun sa diin ginapwersa sang gang leaders nga mag-resign ang wala man na-eleher kundi gin-appoint lamang nga prime minister nga si Ariel Henry.
Sang nag-anunsyo na ini sang iya resignation, wala gihapon nakuntento ang mga gang kundi nagpaandam pa nga pangdalahigon pati ang pamilya sang mga opisyal nga magapahilabot sa transition council.
Ang nagapanguna sa mga gang amo ang anay pulis nga si Jimmy “Barbecue” Cherizier nga amo man ang nagdeklarar sang coordinated attack sang nagligad nga semana rason nga nakaguwa ang masobra 3,700 ka mga preso sa National Penitentiary sa Port-au-Prince lakip na ang mga suspek sa pagpatay sa anay presidente nga si President Jovenel Moïse sang 2021. #
