Nagdangat sa 71 ka mga manpower agencies sa Pilipinas ang napilitan nga magsirado sang ila negosyo subong nga tuig bangud sang COVID-19 pandemic protocols nga amo man ang nagtulod sa mga foreign employers nga mag-paiway anay sa pag-hire sang mga overseas Filipino workers (OFW).
Suno kay Philippine Overseas Employment Administration (POEA) administrator Bernard Olalia, ini nga mga manpower agencies amo ang naga-facilitate sa recruitment kag hiring sang “land-based” overseas workers.
Suno kay Olalio, tuman ang epekto sang pandemya sa overseas employment industry gani napilitan ang mga tag-iya nga i-report sa talatapan nga maga-untat anay sila sang ila nga operasyon.
Suno pa sa opisyal, wala pa nakahatag sang notice ang “sea-based agencies” gani ginapatihan nga mas apektado ang “land-based” ipaanggid sa “sea based” agencies.
Ang land-based manpower agencies amo ang in charge sa pagrecruit sang domestic helpers, factory workers, kag iban pa nga nga professions nga naga-operate “on land”, samtag ang sea-based manpower agencies naman amo ang naga-hire sa staff sang cruise ship kag iban pa nga seafarers.
Nahibaluan nga umpisa sang first quarter sang 2020, madamo na nga gobyerno sa luwas sang pungsod ang nagpatuman sang mga lockdown agud mapauntat ang pagsulod sang mga travelers nga amo ang mahimo halinan sang COVID-19 transmission.
Madamo man nga mga employers sa luwas sang pungsod ang napilitan nga mag-lay off sang linibo ka mga overseas Filipino workers bangud apektado man ang ila nga negosyo kag palangabuhian.
