ILOILO CITY- Masobra sa 7,000 ka mga pulis kag augmentation forces ang gindeploy para sa Iloilo Dinagyang Festival 2023.
Sa interview sang Bombo Radyo Police Brigadier General Leo Francisco, director sang Police Regional Office 6, iya ginpahayag nga ang nasambit nga mga pulis ang ipalapta sa palibot sang syudad.
Suno kay Francisco, hugot nga seguridad ang ila nga ipatuman ilabi na nga madamo nga mga very important persons (VIP) kag mga celebrities ang magapadulong sa syudad.
Kalakip na diri si First Lady Louise “Liza” Araneta-Marcos kun sa diin makaupod niya ang iya mga anak.
Hugot man nga dumilian ang paggamit sang mga pulis sang cellphone samtang naka-duty agud makatutok ang mga ini sa ila nga trabaho.
Magluwas sa pulis, mangin kabahin sang pagpatuman sang seguridad ang mga personnel gikan sa Philippine Army, Philippine Coast Guard Bureau of Jail Management and Penology, Bureau of Fire Protection, Public Safety and Transportation Management Office, kag Reserved Officers Training Corps.
