Naghingyo ang Office of the President sang masobra P1 billion agud pondohan ang domestic kag international trips ni President Ferdinand Marcos Jr para sa masunod nga tuig.
Suno kay Department of Budget and Management (DBM) Secretary Amenah Pangandaman, yara sa P1.054 billion ang request nga mas manubo sa P1.148 billion nga ginpain para sa mga byahe sang Chief Executive subong nga tuig.
Katumbas ini sang otso porsyento nga pagnubo ukon P94-million suno pa sa tiglikom.
Nahibaluan nga ginakwestyon sang mga kritiko ang masami nga byahe sang presidente sa luwas sang pungsod apang ginasiling naman sang Malacañang nga tuyo sini nga ma-promote ang Pilipinas bilang investment destination kag agud nga mapasangkad pa ang partnerships sa mga kaalyado nga pungsod.
Suno pa kay Pangandaman, bisan pa nga mas manubo ang budget para sa byahe ni Marcos sa 2025, padayunon sang gobyerno sang Pilipinas ang mga lihok agud nga ma-market ang nasyon sa potensyal nga investors kag i-follow up man ang nauna nga mga promisa sa investments.
Pahayag sini, sila nga economic team kag ang Department of Trade and Industry (DTI) ang magapadayon sa paghimo sini nga estratehiya para nga matib-ong ang Pilipinas.
Nahibaluan nga halin sang nagpungko si Marcos sang Hunyo 30, 2022 tubub sa katapusan ang 2023, nagdangat na sa 19 ka beses nga nagkadto ini sa luwas sang pungsod.
Sang Pebrero, ginpahayag sang Presidential Communications Office nga 46 ka mga proyekto balor $14.2 billion sa foreign investments ang na-actualize bangud sa mga byahe ni Marcos sa sini nga period.
