ILOILO CITY – Masobra sa P15 billion ang ginalauman nga makinot sang gobyerno nagikan sa cash assistance program kasunod sang findings sang Department of Social Welfare and Development (DSWD) nga masobra sa 1.3 million beneficiaries sang Pantawid Pamilyang Pilipino Program ang indi na qualified.
Ini ang ginpagwa nga statement ni Press Secretary Trixie Cruz-Angeles matapos ang nangin report ni Social Welfare Secretary Erwin Tulfo sa Cabinet meeting sa Malacanang.
Suno kay Angeles, ginaproseso na sang DSWD ang pag-validate sang listahan sang 1.3 million nga benefeciaries sang 4Ps nga indi na qualified nga magbaton sang cash aid bangud nga nag-maayo na ang ila kabuhi.
Bangud sini, makakinot sang P15 billion ang gobyerno kag mahatag naman sa iban nga kwalipikado nga magabulos sa ila kag malakip sa 4Ps program.
Suno sa pa sa report ni Tulfo, ang numero sang benefeciaries nga ginkakas ang indi pa pinal bangud mahimo pa nga magtaas ang numero sini.
Suno sa iya, 600,000 pa ang natalana nga ipaidalom sa interview.
Sa P15 billion naman nga mahimo nga mahatag sa iban nga qualified beneficiaries, suno kay Tulfo, mahimo man nga magtaas pa ini.
Nasorpresa man ang presidente sang nahibaluan niya ang kadamuon sang kakson apang suportado sang Chief Executive ang amo nga tikang sang gobyerno.
Ini ang marching order sang presidente nga tinluan ang listahan sang 4Ps.
