ILOILO CITY – Nagdangat sa masobra P3 million nga balor sang iligal nga droga ang nakuha sa ginpatigayon nga drug buy bust operation sa Bakhaw, Mandurriao, Iloilo City.
Ang arestado amo si Ronaldo Pedrosa, 42, residente sang Bolilao, Mandurriao, Iloilo City, apang nagarenta lang sa Bakhaw, Mandurriao.
Sa interview sang Bombo Radyo kay Police Captain Val Cambel, hepe sang Iloilo City Police Station No. 10, iya ginpahayag nga madugay na nila nga gina-monitor ang durugista.
Suno kay Cambel, armado nga tawo si Pedrosa rason nga nagahalong sila sa tion nga magpatigayon sang operasyon.
Nakuha naman sa posisyon sini ang ginabanta 450 grams sang suspected shabu.
Magluwas diri, nakuhaan pa gid ini sang 38 caliber nga armas.
Nagapati naman si Cambel nga may yara ini sang handler.
Ginakuha naman sini sa Iloilo Province ang iligal nga droga kag ginabaligya sa Iloilo City.
Sa subong, preso na ini kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
