Ipatawag sang local government unit (LGU) sang Lemery ang mga tag-iya sang duta sa ila nga banwa agud ma-engganyo ang suporta sa pagtanum kag pagpatubo sang kahoy.
Sa interview sang Bombo Radyo kay Mayor Oscar Villegas, iya ginpahayag nga plano subong sang banwa nga pasangkaron pa ang massive tree planting kag tree growing program agud makabawi sa nakalbo na nga kabukiran kag agud malikawan ang lapnagon nga pagbaha.
Sa subong, may nga nurseries na ang mga barangay suno kay Villegas agud mapatubo ang mga seedlings kag mas malapit ang kuhaan kun may yara sang tree planting activity.
Ang nurseries amo man ang ginahingyo sang Provincial Environment ang Natural Resources (PENRO) sa mga komunidad.
Suno kay Villegas, nagabulig ang Department of Environment and Natural Resources (DENR) sa sini nga programa.
Wala pa sang forest land-use plan ang amo nga banwa suno kay Villegas apang ginaproseso na subong suno sa iya ang ila komprehensibo nga plano.
Ang forest land use plan kuntani amo ang kinahanglanon agud ma-regulate ang paggamit sang duta kag ma-promote ang mas balanse kag husto nga social kag environmental outcomes nga wala nagaka-sakripisyo ang paggamit sang resources.
Lima ka mga barangay ang subong ginakabig nga kritikal bangud masami nga ginabahaan.
Ginatudlo nga rason sang alkalde amo ang kaingin kag “wala untat” nga pagtanum sang mais sang mga tawo sa baylo nga pagtanum sang kahoy.
