ILOILO CITY – Nagahingyo ang Iloilo City Police Office (ICPO) sa publiko nga i-surrender ang ginahuptan nga granada ukon ireport sa otoridad ang sin-o man nga nahibaluan nga may granada.
Ini ang kabahin sang ila kampanya para sa “May Kwarta sa Granada” project kun sa diin P1,000 ang kabaylo sang kada live grenade nga masurrender sa pulis.
Sa interview sang Bombo Radyo kay Police Corporal Christopher Dignadice, focal person sang “May Kwarta sa Granada” kag katapo sang Police Strategy Management Unit – Iloilo City Mobile Force Company, iya ginpahayag nga 2016 sang nag-umpisa ini nga proyekto kag ideya sang advisory council para sa police development sang Iloilo City Police Office.
Ini nga proyekto ang nagatuyo nga maengganyo ang mga tawo nga ma-turnover sa ila talatapan ang tanan nga mga granada kag explosives agud matatap sang husto kag indi mabutang sa delikado ang kabuhi sang tawo ilabi na sang mga kabataan.
Ini nga programa ang ginsuportahan sang Iloilo City Advisory Council-Police Transformation Development kag sang local government unit sang syudad.
Abiso ni Dignadice sa pumuluyo, mas maayo nga mag-report sa ila ginasaligan nga police official, ukon sa ila nga barangay officials para sa proper documentation.
Ang trained nga personnel sang otoridad ang magakadto sa nagahupot sang granada agud makuha ini nga hilway sa katalagman.
