ILOILO CITY- Nagdepensa ang alkalde sang banwa sang Anilao, Iloilo nga indi siya ang rason kun ngaa gin-relieve sa pwesto ang anay hepe sang Anilao Municipal Police Station nga si Police Captain Ma. Fe Umiten.
Sa interview sang Bombo Radyo kay Mayor Nathalie Ann Debuque, iya ginpahayag nga nag-agi sa insakto nga proseso ang pag-relieve kay Police Captain Umiten bilang hepe sang ila banwa.
Suno kay Debuque, wala man sila nag-ekspektar sa gulpiyada nga pag-reshuffle sang Police Regional Office 6 kay Police Captain Umiten antis nagtakop ang tuig 2023.
Nahibaluan nga gin-relieve bilang hepe sang Anilao Municipal Police Station si Police Captain Umiten matapos gindagdagan sang relieve order halin mismo sa Police Regional Office 6.
Ginbuslan naman ini Police Captain Jesse Lepania bilang bag-o nga hepe sang Anilao Municipal Police Station.
Matandaan nga nangin kontrobersyal si Umiten matapos napaslawan ini nga solbaron ang kaso sang kamatayon sang choreographer nga si Leonard “Batoto” Balasoto sang Disyembre 13, 2023.
Naggwa sa autopsy nga may yara sang foul play sa kamatayon ni Balasoto baliskad sa pahayag ni Umiten nga aksidente gid lang ang natabo.
