ILOILO CITY – Nagpasalamat si Iloilo City Mayor Jerry Treñas sa Chairman sang Florete Group of Companies nga si Dr. Rogelio Florete sa pagsabat sa iya panawagan nga magbinuligay agud mabatuan ang COVID-19.
Sa interview sang Bombo Radyo Iloilo kay Treñas, iya ginpahayag nga dako ang mabulig sa ginhimo nga desisyon ni Dr. Florete nga hatagan sang libre nga COVID-19 vaccine ang linibo nga mga empleyado sang Florete Group of Companies, indi lang sa Syudad sang Iloilo kundi sa bilog nga Pilipinas.
Suno sa alkalde, sa tion nga mabakunahan na ang 70% sang mga pumuluyo, pat-od nga may yara na sang herd immunity ukon population immunity.
Sa sini, mahimo na nga makagwa nga wala sang face mask kag face shield kag mangabuhi sang normal ang mga pumuluyo.
Nahibaluan nga duha ka shots sang tested, proven kag de-kalidad nga COVID-19 vaccine ang ihatag sang libre ni Dr. Florete sa diin ginpahayag sini nga dako ini nga bulig agud indi na magmasakit ang mga empleyado sang kumpaniya.
Gin-athag man sang natungdan nga hatagan sang kinamatarong ang kada empleyado kun luyag niya ukon indi nga magbaton sang COVID-19 vaccine.
Ang Florete Group of Companies, ang ginabug-usan sang Media (Bombo Radyo/ Staf FM), Banking (Queenbank), Real Estate, Water (FloWater), Mall operation, Aquaculture kag Pawnshop and Jewerly (R. Florete).
