ILOILO CITY- Gin-imbitar ni Iloilo City Mayor Jerry Treñas si President Ferdinand “Bongbong” Marcos Jr. kag si First Lady Liza Araneta Marcos sa palaabuton nga selebrasyon sang Dinagyang Festival 2024.
Sa interview sang Bombo Radyo kay Treñas, iya ginpahayag nga magluwas sa presidente, imbitado man niya si Vice President Sara Duterte-Carpio kag mga senador agud magpakigbahin sa tuigan nga selebrasyon.
Suno sa alkalde, indi pa niya makumpirma kun mapadulong gid man ang nasambit nga mga opisyal sang gobyerno apang naghatag ini sang isa ka semana agud mapat-ud ang pagtambong sang mga ini.
Magluwas diri, imbitado man sang alkalde sanday Bacolod City Mayor Alfredo Benitez kag ang gindeklarar sini sadto nga persona non grata nga si Bacolod City Vice Mayor El Cid Familiaran.
Ginpahayag naman sang alkalde nga gin-imbitar man ni USWAG Representative Jojo Ang sanday Senator Chiz Escudero kag ang iya asawa nga si Heart Evangelista, former Senator Kiko Pangilinan kag ang iya asawa nga si Sharon Cuneta.
