“Mayor Treñas, maluoy ka may krisis pa subong” -pag pakitluoy sang mga vendors sa San Pedro Molo Terminal

ILOILO CITY – Nagtipon ang tanan nga mga apektado sang pagpasirado sang San Pedro Molo Terminal kag nag-sindi sang kandila bilang pagpamatok.

Sa interview sang Bombo Radyo kay Barangay Tanod Richard Natanauan, iya ginpahayag nga 140 ka mga pamilya ang apektado sang pagpasirado sang terminal bangud diri lang nagakuha sang palangabuhian ang mga tawo sang San Pedro Molo.

Suno kay Natanauan, mahimo nga masalbar sila sa COVID-19 apang magutuman naman sila bangud sa pagkadula sang ila palangabuhian.

Samtang indi naman ma punggan sang isa sa mga vendors sa terminal nga magpabutyag sang iya kalain sang buot.

Suno kay Richelle, bangud ginpasirado na ang terminal, wala sila kabalo kun ano ang mangin kabuhi nila sa mga masunod nga inadlaw.

Nagpalab-ot man ini sang mensahe kay Iloilo City Mayor Jerry Treñas sa diin iya ginhingyo nga hatagan pa sila sang malawig nga tion agud nga makabaligya pa sa terminal.

Ginaproblemahan man sang isa pa ka vendor ang mga ginpangumpra niya nga baligya bangud indi na mabalik ang iya kapital.

Pahayag ni Lucia Deligero, indi man siya mahimo nga makasaylo sa Mohon Terminal bangud indi niya masarangan ang balaydan sa arkila.

Ginkwestyon naman ni Jane Moreno, Presidente sang Brgy. San Pedro Vendors Association si Mayor Treñas kun bala may yara ini sang kalain sang buot sa mga pumuluyo sang barangay bangud sa iya nangin desisyon nga pagpasirado sang terminal.

Sa pagkamatuod, nagabayad man sang arkila ang 80 ka mga vendors sa Iloilo City Hall.

Kasubo naman ang nabatyagan ni San Pedro Molo Punong Barangay Karl John Lapascua bangud madamo sang palangabuhian ang nadulaan kasunod sang pagpasirado sang terminal.

Suno kay Lapascua, indi bastante ang tatlo ka adlaw nga ginhatag sa ila sang alkalde agud nga makapreparar ang mga vendors sa paghalin sa lugar.

Sang nabaton niya ang Executive Order 95 series of 2020, iya ginpatawag ang mga vendors kag ginkuhaan sang pahayag sa diin halos tanan sila ang naghilibi-on.

Ang closure order ang nasanto sa rekomendasyon sang Land Transportation Franchising and Regulatory Board bangud may yara sang madamo nga violations kag wala nakapasar ang Molo PUV Terminal sa standards sang nasambit nga ahensya.