ILOILO CITY – Nagpangayo sang pasaylo si Iloilo City Mayor Jerry Treñas sa mga pumuluyo sa syudad sang Iloilo bangud sa pag-ulayhon sa anak ni City Legal Officer Atty. Edgar Gil nga makapauli sa syudad halin sa Manila kag sang ulihe nagpositibo sa Coronavirus Disease 2019.
Sa interview sang Bombo Radyo kay Mayor Treñas, iya ginpahayag nga indi man siya kuntani magsugot nga papulion ang babaye nga 51 anyos kag WV #55, apang may extraction kits nga kinahanglan gid nga maipadala.
Suno kay Treñas, wala na niya ginasapak pa ang malain nga tinaga nga ginahaboy sa iya bangud iya man nga ginatinguhaan nga mahimo ang tanan nga iya ikasarang para sa syudad.
Sa subong, ginalantaw niya kun pila tanan nga mga Ilonggo ukon Overseas Filipino Workers ang mapauli sa syudad.
Kuntani antes magpauli, ipaidalom anay sa test ang mga Overseas Filipino Workers apang sa nahibaluan sang alkalde, wala sang available nga test ang Overseas Workers Welfare Administration.
Pahayag sang alkalde, mahimo ang syudad na lang ang mabakal sang test kits agud nga mapaidalom ang Overseas Filipino Workers sa test kag gilayon nga ma isolate sa tion nga mag-abot na sila sa syudad.
Mahimo pa nga maka akomodar ang nagkalain-lain nga isolation facility sa syudad para sa mga Ilonggo ukon Overseas Filipino Workers sa diin 100 ka tawo sa St. Therese Hospital, 100 man sa Iloilo Diamond Jubillee Hall kag 100 man ka tawo sa University of Iloilo-PHINMA.
