ILOILO CITY – Nagakadapat nga hatagan sang importansya ang mental health ilabi na nga ginadumdum subong nga bulan sang Setyembre ang suicide prevention month.
Ini ang nagtulod sa mag-abyan nga sanday Vince Lonie Tuvalles Orquinaza, registered psychometrician kag Mariel Ledesma Terre, licensed teacher, sa pagtukod sang Abyanihan.
Sa exclusive interview sang Bombo Radyo kay Terre, iya ginpahayag nga ang Abyanihan ang isa ka mental health support group sa diin katuyuan nila nga mapabalo sa publiko ang importansya sang mental health.
Sang una suno kay Terre, duha lang sila ni Orquinaza ang myembro sang Abyanihan, apang sa subong, 28 na ang ila myembro kag padayon nga nagadamo.
Subong nga suicide prevention month, ang Abyanihan mental health support group ang nagpadayon sa ila passion project nga Padayon sa Paglaom, isa ka series sang webinars.
Bukas man sila suno sa natungdan sa mga luyag magpa-myembro ukon magpangayo sang bulig sa diin nagakadapat nga mag-message lang ang mga ini sa ila Facebook page nga Abyanihan.
Samtang suno naman kay Orquinaza, ginalibot nila ang mga lugar ilabi na ang mga wala sang internet signal agud magpatigayon sang extensive mental health education.
Ginpahayag ni Orquinaza nga apisar may pandemic, ginalat-as nila ang mga malayo nga lugar sa banwa sang Tigbauan, Iloilo agud sapulon ang mga ginikanan kag ila kabataan.
Panugyan ni Orquinza, indi dapat pagtawgon nga buang ang isa ka tawo nga may problema sa iya mental health.
Ang nagakadapat nga termino suno sa natungdan sa mga may problema sa mental health amo ang Schizophrenia, Depression, Hallucination, kag Delusion.
Sa baylo nga kadlawan kag pakamalauton, mas maayo nga magtanyag sang imo oras sa tawo kag ipabalo sa ila nga importante sila.
Dugang pa sang natungdan, nagakadapat nga liwaton man ang perception nga nabuang na ang isa ka tawo nga nagakadto sa Psychologist kag Psychiatrist.
