ILOILO CITY – Gin-athag ni Chinese Ambassador to the Philippines Huang Xilian nga wala sang problema sa resupply mission sang Pilipinas sa Ayungin Shoal bangud nga sakop ini sang special agreement sa tunga sang duha ka mga pungsod.
Apang suno sa iya, ang problema ang nagtuhaw bangud nga nagadul-ong sang construction materials ang Pilipinas, ang butang nga wala pa ginkumpirma sang gobyerno.
Sa ginpatigayon nga 9th Manila Forum sa Quezon City, ginpamangkot si Huang may kaangtanan sa tikang sang China Coast Guard kag kun bala, may yara sang mandu nga untatan ang pag-atake sang BRP Sierra Madre sa Ayungin Shoal.
Sang Agosto 5, gin-target sang China Coast Guard vessels sang water projectiles ang Philippine resupply boats samtang padulong sa shoal.
Suno sa National Task Force on the West Philippine Sea, nagtuyo nga magharang ang China Coast Guard sa resupply mission apang madinalag-on ini nga nakumpleto nga wala sang anuman nga insidente.
Sang ginpamangkot may kaangtanan sini, wala na naghatag pa sang detalye si Huang.
Sa baylo, ginbasol niya ang Estados Unidos kag sa iban nga mga pungsod nga nag-akusar sa ila nga nagapaluntad sang problema sa West Philippine Sea kasunod sang Ayungin Shoal incident.
Sang nagligad nga semana, isa ka makasaysayan nga trilateral summit ang natabo sa Camp David sa Estados Unidos kun sa diin, nahisugtan nanday President Joe Biden, President Yoon sang South Korea, kag Prime Minister Kishida sang Japan nga pabaskugon ang defense cooperation sa mga pungsod.
Ang tatlo ka mga pungsod lakip na ang Pilipinas ang nagpahayag sang kabalaka sa pagpamomba sang tubig sang China Coast Guard sa Philippine resupply vessels.
Suno kay Huang, nagalaum ang China nga ang mga regional countries lakip na ang Pilipinas ang magpabilin nga vigilante batuk sa iya ginpahayag nga malisyoso nga tinutuyo nga nagabutang sa alang-alang sang kalinong kag stability sa West Philippine Sea.
Wala pa sang sabat nagikan sa Estados Unidos, Japan, kag South Korean embassies sa Pilipinas may kaangtanan sa pahayag ni Huang.
Suno naman kay United States Assistant Secretary of State for East Asian and Pacific Affairs Daniel Krintenbrink, ang kasugtanan nga nahuman sa trilateral summit ang wala nagatuyo nga atakehon ang China kundi, pasiguraduhon nga maproteksyunan ang rehiyon kag ang iban pa nga mga pungsod sa nagalala nga issue.
Sa bahin sang Pilipinas, ang Department of Foreign Affairs ang wala pa nakahatag sang statement may kaangtanan sa pahayag ni Huang.
