ILOILO CITY – Dako ang problema subong sang mga kubos nga pumuluyo sa syudad sang Iloilo matapos ang pagpatuman sang community quarantine sa syudad.
Sa interview sang Bombo Radyo kay Maura Abelion sang grupo nga Urban Poor, sila nga mga kubos ang una nga naapektuhan sang pagpatuman sang community quarantine sa syudad bangud kalabanan sa ila ang nadulaan sang palangabuhian.
Suno kay Abelion, wala pa sila sang nabaton nga ayuda nagikan sa gobyerno gani wala sila sang ideya kun paano nila atubangon ang krisis nga gintuga sang Coronavirus Disease 2019.
Kadungan sini, nanawagan ang natungdan sa City Government nga hatagan anay sang prayoridad nga mabuligan ang mga kubos nga komunidad antes ipatuman ang posible nga paglockdown sa syudad bangud sila ang una nga maapektuhan.
