GUIMARAS – Nagapadayon ang koordinasyon sang nagkalain-lain nga sektor sa probinsya sang Guimaras agud hugot nga mabantayan ang probinsya batok sa makamamatay kag makalaarma nga coronavirus disease 2019 (COVID-19).
Kaangot diri, labi man nga ginpadali ang proseso sang screening para sa mga turista nga nagasulod sa probinsya kag nagaagi sa Jordan Wharf.
Sa interview sang Bombo Radyo kay Kagawad Rodrigo Galgo, opisyal sa Brgy. Poblacion, Nueva Valencia, Guimaras, iya ginpahayag nga sa kada barangay sa tagsa ka munisipalidad sa probinsya, may yara sang nakahanda nga mga stickers nga mahimo ipanagtag sa mga tumandok.
Suno sa natungdan, ini nga mga stickers ang mahimo nga itapik sa valid ID sang mga residente agud nga sa tion nga mag-agi na ini sa pantalan, mahibaluan gilayon nga ini nga tawo ang residente na sang Guimaras kag indi na madugayan ang proseso sa pagtsekyar.
Nahibaluan nga may yara pa sang declaration check list nga kinahanglan sabtan sang mga turista agud nga mahibaluan kun diin sila nga pungsod naghalin.
Suno sa natungdan, kun sa Iloilo man lang nagakadto ang mga pasahero, makabulig ang amo nga stickers agud mabuhinan ang tiyempo sa pag-cross examine sa puerto.
Madamo man suno sa iya sang estudyante nga nagakuha sang stickers bangud sila ang masami nag nagatabok sa syudad sang Iloilo.
Wala man sang bayad ang mga stickers apang ginabaton ang donasyon.
