Nag-umpisa na ang pagdagsa sang mga tawo sa isa ka barangay sa Mandaluyong City kasunod sang mga “wanted” nga nagkaladakpan kag gin-turn over sa mga otoridad.
Ini nga mga wanted “dead or alive” amo ang mga lamok kag pitik-pitik nga ginapangdakop sang mga residente kag ginahatag sa barangay kabaylo sang piso.
Pebrero 21 pa kuntani maga-umpisa ang programa nga ‘May Piso sa Mosquito’ apang indi na makahulat ang mga taga-Barangay Addition Hills kag nag-arangkada na sila sa pagpangita sa mga insekto umpisa Pebrero 19.
Nagabayad ang barangay sang P1 sa kada lima ka lamok ukon kiti-kiti nga ginadala sa ila, buhi man ukon patay.
Ginatipon ini sang barangay sa glass cage sa ila nga barangay hall. Ginklaro man sang mga opisyal nga indi pwede makaintra ang mga menor de edad sa dakpanay sang lamok.
Kabahin ini sang tikang sang barangay para nga matapna ang dengue cases nga subong naglab-ot na sa 44.
Extra man ini nga encouragement bangud mas nagpisan ang iban sa pagpanglimpyo sa ila mga tarog kag sa ila mga ginasuptan sang tubig.
Subong, sobra na sa 700 ka mga lamok ang natugyan sa barangay.
Magapadayon ini nga programa tubtub nga magnubo ang kaso sang dengue sa ila nga lugar.
