ILOILO CITY – Dismayado ang mga pumuluyo nga nagpadulong sa University of San Agustin Gymnasium nga mapabakuna kuntani batok sa COVID-19 subong nga adlaw.
Ini matapos naruya ang mga ini sang natukiban nga nagbaylo ang venue sang ila vaccination.
Sa interview sang Bombo Radyo kay alyas Baby, iya ginpahayag nga naghalin pa sila sa distrito sang Jaro agud kuntani magbaton sang second dose sang bakuna.
Suno sa natungdan, wala sila makabaton sang mensahe nga gin-ilisan ang venue sang ila vaccination.
Tungod sini, nagpadulong nalang sa Iloilo Convention Center ang mga mapabakuna sa diin nagtuga ini sang dako nga huol.
Nahibaluan nga gin-post lang sang Iloilo City Government ang Public Advisory sa ila Facebook page less than 24 hours antes ang vaccination, apang wala sang anuman nga verbal kag mobile advisory.
