Padayon ang pagpakig-angot sang Department of Justice sa pila ka mga ahensya sang gobyerno agud istoryahan ang pagpanagtag sang mga medical supplies nga nagabalor sang halos P41.7 milyon sa mga frontliners nga nakumpiska sang National Bureau of Investigation.
Suno kay Department of Justice Under Secretary kag Spokesman Mark Perete, may yara na sila sang gindihon nga Inter-Agency Circular nga pirmahan sang Bureau of Customs, Department of Health, Department of Interior and Local Government lakip man ang Department of Agriculture para sa mga nakumpiska nga agricultural goods.
Katuyuan sang nasambit nga circular ang mahatagan sang seizure kag forfeiture ukon disposition ang mga confiscated goods.
Sa subong ang Department of Justice kag Department of Trade and Industry palang ang nakapirma sa nasambit nga circular.
Ang halos P41 milyon nga balor sang mga medical items nga nakumpiska sang National Bureau of Investigation ang bangud man sa ginpatigayon nga profiteering, hoarding, kag mga overpricing sa mga limitado nga medical supplies humalin sang ginpatuman ang enhanced community quarantine bangud sa pagkabalaka nga maglapta pa ang Covid-19.
Suno naman kay National Bureau Investigation Director Eric Distor, lakip sa mga nakumpiska nga mga items amo ang mga alcohol, hand sanitizer, thermal scanners, personal protective gear kag surgical gloves.
Magluwas sa P40 milyon nga balor sang medical supplies naglab-ot man sa 122 ka mga indibidwal ang ila naaresto sa mga buy bust kag entrapment operations.
