Nagsaka na sa siyam ang numero sang nagkalamatay kasunod sang pagpangluthang sang 14-anyos nga Grade 9 student sa Debsirin Nonthaburi School sa Thailand.
Lakip sa casualties amo ang apat ka manunudlo, isa ka staff sang eskwelahan, isa ka estudyante, kag mismo ang Lolo kag Lola sang suspek. Gintiro man sang suspek ang iya kaugalingon kasunod sang krimen.
Masobra 20 ang nasamaran sa amo nga insidente kun sa diin walo ang yara sa kritikal nga kondisyon.
Suno kay Bombo International Correspondent Cleo Rose Jondonero direkta sa Thailand, isa sa mga naggaguwa nga anggulo amo ang gin-report sang suspek kahapon nga gin-bully siya sa eskwelahan.
Ginpahayag nga gintulod kag gin-lock sa CR ang amo nga bata, kag ginapahayag nga nakapangayo pa ini sang bulig sa iya manunudlo matapos ang insidente, apang wala nahatagan sang nagakaigu nga igtalupangod.
Base naman kay Thai Prime Minister Anutin Charnvirakul, nakit-an nga “under stress” ang bata kag nagagwa sa imbestigasyon nga planado ang pagpang-atake antes ini nagpanginmatay.
Nahibaluan nga ang Lolo kag Lola nga retired teacher kag retired bank manager amo ang nagatatap sa bata. Base sa tiya sini, mabuot, hipuson, kag talagsa lang nagagwa ang 14-anyos nga suspek.
Suno pa kay Jondonero, base sa pagpangusisa sang kapulisan sa Search history sang bata sa internet, nakit-an nga naglantaw ang bata sang videos kaangot sa school shootings kag mass shooters kag may yara man sang Roblox links nga naangot sang pag-uyat sang firearms.
Ang Lolo amo ang tag-iya sang armas nga gin-gamit sang bata sa krimen. Indi klaro kun paano niya ini nakuha.
Nagapadayon pa subong ang imbestigasyon sang kapulisan kasunod sang amo nga insidente.
