Nagsaka na sa apat ang numero sang mga estudyante nga napatay sa shooting incident sa sulod sang San Jose National High School sa Tacloban City kahapon sang aga, Hunyo 22.
Suno sa Philippine Red Cross (PRC), ang pinakaulihi nga biktima nga ginbawian sang kabuhi amo ang estudyante nga nagapaidalom pa kuntani sa pagbulong sa ospital.
Pahayag naman sang Philippine National Police subong nga aga, nagsaka na sa 20 ang numero sang napilasan.
Nahibaluan nga yara na sa kustodiya sang mga pulis ang mga suspek nga amo sanday alias Rod, 15-anyos, kag alias Nash, 14-anyos, lunsay Grade 9 students pa lamang sa amo nga eskwelahan.
Nagagwa sa inisyal nga imbestigasyon nga nagsulod sila sa duha ka classrooms kag nagpangluthang sa 40-50 ka classmates nila sang alas nueve sa aga kahapon.
Sandig sa pulis, nagdangat sa 40 ka basiyo sang bala ang na-recover sa eskwelahan.
Na-recover man ang 9mm Glock pistol nga gin-issue sa isa ka babayi nga pulis halin sa Police Regional Office 8. Ginapahayag hinablos niya ang isa sa mga suspek.
Samtang, nakarehistro naman sa isa ka security agency sa Cebu City ang .38 caliber revolver nga isa pa ka armas nga gingamit sa krimen.
Suno kay PNP Spokesperson Colonel Allen Rae Co, nag-reload pa sang police-issued handgun ang isa sa mga suspek sa tion sang insidente.
Ini nga shooting incident ang ginakabig naman sang Department of Education (DepEd) nga “high alert situation”.
Suno sa DepEd, ginakondenar sini ang amo nga akto sang kasingki.
Nagpahayag ang ahensya nga padayon ini nga nagapakig-angot sa mga ahensya sang gobyerno agud nga maghatag sang medical assistance kag psychosocial interventions sa apektado nga mga estudyante kag mga personnel.#
