Daku ang populasyon sang Barangay San Juan, Molo, Iloilo City rason nga indi na matatapan sang mga barangay officials ang mga health protocol violators.
Sa interview sang Bombo Radyo kay Punong Barangay Pascual ‘Sipil’ Espinosa, iya ginpahayag nga apisar sang ila pagpangabudlay kag pagpatrol, may mga salawayon sa gihapon nga mga pumuluyo nga wala nagapati sa minimum health protocols.
36 na suno sa natungdan ang nadakpan sang compliance team kag naisyuhan sang citation tickets matapos madakpan nga wala nagasuksok sang face mask, wala nagapractice sang physical distancing, kag nagalapas sa iban pa nga patakaran sang syudad batok sa COVID-19.
Suno kay Espinosa, sa subong, padayon ang paglibot sang mga barangay tanod agud pahangpon ang mga tawo.
Siya mismo suno sa natungdan ang magalibot man kag managtag sang flyers sa mga residente agud mahibaluan man nila nga may penalidad ang madakpan sang compliance team.
Nahibaluan nga deputized naman ang mga barangay officials sa pagdakop sa mga nagalapas sa minimum health protocols.
