GUIMARAS- Nagpabutyag sang pagkadismaya ang mga opisyal sang Probinsya sang Guimaras sa pagpabaya sang Philippine Coastguard sa natabo nga trahedya sa Iloilo Strait nga ginkamatay sang 31 ka mga biktima.
Sa interview sang Bombo Radyo Iloilo kay Jordan, Guimaras Mayor Ruben Corpuz, iya ginpahayag nga sang matabo ang pagkulob sang tatlo ka mga motorbanca, nasaksihan niya kun paano napaslawan ang Philippine Coastguard nga magpakita sang chain of responsibility.
Suno kay Corpuz, samtang masako sila nga mga opisyal sang Guimaras kaupod ang City Disaster Risk Reduction and Management Office, halos indi naman makit-an ang mga katapo sang Philippine Coastguard.
Ginpahayag sang opisyal nga wala man sang ground commander nga nagahatag sang mando sa iban nga katapo sang Philippine Coastguard bangud ginahulat pa nila nga makabalik ang ila Station Commander nga si Lt.Commander Perlita Cinco nga yara pa sa Antique sang magluntad ang trahedya.
Dugang pa sang alkalde, nakita niya si Commodore Allan Victor Dela Vega, Coast Guard Western Visayas District commander nga nagapanglibot sa mga survivors nga gindala sa Parola Wharf apang hinali man lang ini nga nadula.
Suno naman kay Mayor Eugene Reyes sang Buenavista, Guimaras, wala sang maathag nga protocol ang Philippine Coastguard.
Ginpahayag sang alkalde, wala man sang sense of urgency ang Philippine Coastguard sang matabo ang trahedya.
Ginakabig naman ni Reyes nga dako nga blunder ang ginhimo nga pagpabaya sang Philippine Coastguard sa ila katungdanan.
