ILOILO CITY – Mas ginpataas pa ang pagpangudal sa bilog nga Western Visayas agud nga maprotektahan ang multi-billion hog industry sang rehiyon batok sa African Swine Fever (ASF).
Sa interview sang Bombo Radyo kay Dr. Jonic Natividad, chief sang Regulatory Division sang Department of Agriculture Region VI kag pinuno sang Western Visayas ASF Inter-Agency Taskforce, iya ginpahayag nga gina-umpisahan na subong ang pagpangbukas sang mga delivery trucks sa mga pantalan.
Ini ang santo sa nakasugtan sang mga provincial veterinary offices sa rehiyon agud mapat-od nga wala sang makalusot nga mga pork and pork products halin sa Luzon kag iban pa nga mga lugar nga apektado sang ASF.
Suno kay Natividad, sang holiday season, may yara sang mga nagpalusot sang hamon kag tocino paagi sa pagsulod sini sa mga box sang ulutanon kag isda.
Ginabantayan man ang mga online sellers kag ang mga couriers nga may door-to-door transactions.
Ang Aklan kag Negros Occidental ang may yara naman sang amended executive orders sa pag-ban sa pork and pork products halin sa Mindanao partikular sa Davao Region bangud sang new outbreaks nga nakumpirma sang damlag lang sa Davao Occidental kag Davao City.
Magluwas diri, hugot man ang pag-coordinate sang DA kag sang Bureau of Animal Industry sa mga local government units agud nga mapat-od ang 24/7 nga mga operasyon sa animal quarantine checkpoints amo man ang monitoring sang meat dealers kag retailers agud mapat-od nga tanan nga pork products nga ginabaligya ang may yara sang seal halin sa National Meat Inspection Service (NMIS).
Ginaengganyo man ang publiko nga mag-report sa otoridad kun may nahibaluan nga may iregularidad sa baligyaanay sang baboy sa ila nga komunidad.
Ang Food and Drug Administration ang magapatuman sang sanction sa sin-o man nga madakpan nga nagalapas sini nga pagsulundan.
Una na ginpahayag sang DA nga ‘more than 200 percent self-sufficient’ ang Western Visayas kun iduso sang gobyerno nga i-total ban ang tanan nga pork kag pork products halin sa tanan nga rehiyon sa Pilipinas.
