Ginkumpirma sang Overseas Workers Welfare Administration (OWWA) nga nagsaka na sa anum ang numero sang mga Pilipino nga nasamaran bangud sang missile strikes sang Iran sa Israel.
Sa sini nga numero, apat na ang nakaguwa sa ospital, isa ang padayon pa nga naga-recover, samtang isa naman ang yara sa kritikal nga kondisyon.
Isa ini nga caregiver nga nadagdagan sang mga debris sang building nga gin-igo sang air strikes. Yara ini subong sa Intensive Care Unit sa Shamir Medical Center sa Tel Aviv.
Nagsuprer ini sang severe injuries sa iya nga korason kag nag-collapse man ang tuo nga bahin sang iya nga baga.
Suno kay Philippine Ambassador to Israel Aileen Mendiola, gina-monitor sang mga doctor ang kondisyon sini nga Pinay kag kritikal ang masunod nga inoras agud matumod kun kinahanglanon gid ang surgery.
Magluwas diri suno kay Mendiola, 27 ka mga Pinoy ang nag-report nga nagakinahanglan sang relocation matapos nga naapektuhan sang missile strikes ang buildings nga ila ginatiniran.
Naghatag ang Israeli local governments sang temporary shelter kag hotel accommodation kag nagpahayag man ang Philippine Embassy nga handa ini magbulig para makapangita ang apektado nga mga Pinoy sang bag-o nga apartment.
Sa subong sandig sa embassy, 13 na ka mga Pilipino ang nagpabutyag sang intensyon nga magpauli, apang sirado pa ang airport sa Tel Aviv kag mahimo lamang sila ma-evacuate paagi sa land border pakadto sa Jordan.
Wala pa subong sang mandatory evacuation nga ginapatuman apang una na nga ginpahayag sang Department of Migrant Workers (DMW) nga himuon nila ang masarangan agud nga ma-repatriate ang mga OFWs nga luyag magpauli sa Pilipinas.
Nag-ibwal ini nga tension sa Middle East matapos nga nagpalupad ang Israel sang missiles sa Iranian military assets kag personnel, rason nga nagsunod-sunod man ang balos sang Iran sa Israel nga nagdalahig na sang kabuhi sang mga sibilyan.
