Nagbiya na bilang lead defense counsel ni anay president Rodrigo Duterte sa International Criminal Court ukon ICC si Nicholas Kaufman matapos ang iya isa ka tuig nga kontrata sang Marso 31, 2026.
Sa iya ginfile nga resignation sa ICC nga may petsa Mayo 8, nagsiling si Kaufman nga nagkasugtanay sila ni Duterte nga tapuson na ang ila professional engagement.
“Yesterday, the Defense team visited Mr Duterte and documented both Mr Duterte’s release of Counsel from his representation and his desire to hire replacement Counsel – Mr [REDACTED],” suno sa ICC.
Suno pa kay Kaufman, nakapili naman ang anay presidente sang bag-o nga abogado nga magadumala sang iya depensa sa pag-atubang sang kaso sini nga crimes against humanity may kaangtanan sa kontrobersyal nga “war on drugs” sang iya administrasyon.
Dugang pa ni Kaufman, nakaistoryahanay na sila sang bag-o nga legal counsel ni Duterte kag nagpasiguro ini nga ipakigbato ang kampo ni Duterte sa kaso, lakip na ang pag-atubang sini sa masunod nga hearing sang ICC nga nakatalana sa Mayo 27, 2026.
Ginpahayag man ni Kaufman nga may nagakaigo nga eksperyensya sa ICC ang magabulos nga legal counsel ni Duterte gani indi maapektuhan ukon ma-delay ang pagpadayon sa pag-uswag sang kaso sang anay presidente.
Kadungan sang iya paghalin, nagpangabay man si Atty. Kaufman sang pormal nga permiso sa ICC agud makapag-withdraw bilang counsel suno sa proseso kag regulasyon sang korte.
Luwas sini, magapabilin nga confidential ang tanan nga impormasyon nga may kaangtanan sa kaso sang anay presidente apisar natapos na ang professional relationship ni Kaufman sa anay Presidente.
Sa subong, wala pa sang ginpagwa nga pahayag ang kampo ni Duterte natuhoy sa identity sang iya bag-o nga legal counsel.
