Ginpanindugan sang kampo ni Kim Chiu nga indi personal nga isyu sa tunga nila sang iya utod nga si Lakambini ukon “Lakam” Chiu ang ginpasaka nga qualified theft complaint.
Suno kay Atty. Margrein Archernar M. Gregana, legal counsel ni Kim kag sang The House of LittleBunny Philippines, Incorporated ukon HOLB, ang reklamo may kaangtanan sa corporate funds sang kompanya nga gin-akusahan nga ilegal nga ginkuha.
“To be clear, these actions were taken strictly by HOLB, in which Ms. Kim Chiu is a shareholder, to recover the company’s missing funds and ensure accountability among those involved,” suno kay Gregana.
Dugang sang legal counsel, kabahin lamang sang tuig 2025 ang sakop sang reklamo kag wala diri nalakip ang iban pa nga mga tuig nga sakop sang imbestigasyon.
“The corporation is duty-bound to act to prevent further financial losses.”
Dugang pa niya, wala pa nagpakig-angot si Lakam sa mga opisyal sang HOLB, sa legal counsel sini, ukon kay Kim — baliskad sa nagaguwa subong sa social media.
“Statements circulating to the country on social media are inaccurate. HOLB and Ms. Kim Chiu remain fully committed to pursuing complete accountability and recovery through the proper legal channels, and we defer to the wisdom of the courts.”
Naaresto si Lakambini sang Domingo sang hapon sa Mandaluyong City bangud sa arrest warrant may kaangtanan sa 124 ka kaso sang qualified theft.
Suno kay Kamuning Police Station 10 Commander PLTCOL. Aljun Belista, yara si Lakambini sa custodial facility sang estasyon samtang ginahulat ang commitment order halin sa korte.
Sang Disyembre 2025, nagpasaka si Kim sang qualified theft complaint batok sa iya utod matapos niya madiskubre ang seryoso nga mga iregularidad sa pinansyal nga transaksyon sang iya negosyo nga nagabalor sang P44-million.#
