ILOILO CITY – Indi makalusot sa kapulisan ang dungol nga mga pumuluyo nga wala nagasuksok sang face mask kag face shield apisar makapila na mahambalan, masawayan, kag mahatagan sang warning.
Sa interview sang Bombo Radyo kay Pol. Lt. Col. Joem Malong, spokesperson sang Police Regional Office VI , iya ginpahayag nga arestuhon sa gihapon ini nga mga tawo nga wala nagauntat sa pagpasaway.
Ini ang pahayag ni Malong apisar may yara sang una nga statement si PBGen. Ildebrandi Usana, spokesperson sang Philippine National Police, nga indi magpangdakop ang pulis sa mga wala nagasuksok sang face mask kag face shield bangud sa baylo nga mang-aresto, magahatag sila sang suplay sang personal protective equipment (PPE) sa mga violators.
May ginhatag nga donations sang PPE sa hanay sang kapulisan kag ini suno kay Usana ang ihatag sa mga nagalapas sa health protocols.
Suno naman kay Malong, may yara sang degree of implementation ang mga pulis kag sa tion nga may yara sang tawo nga nagapakatig-a sa gihapon sa pagpati sa otoridad, ipatuman gid ang pag-aresto.
“Ang aton nga kapulisan, although ibutang ta bi nga may dala na sila nga face shield o face mask para ihatag sa mga pumuluyo, still, kun may ara gid ya nga tig-a gid ya nga ginahatagan mo na gani sang face mask kag face shield pero wala ginagamit, kinahanglan na na nga arestuhon,” pahayag ni Malong.
Halin sang nag-umpisa ang istrikto nga pagpatuman sang quarantine protocols sa Rehiyon VI, wala naglab-ot sa sini nga degree ang pagpangsaway suno kay Malong bangud nagapati ang mga tawo sa mga implementing authorities.
