Dako ang pagpasalamat sang mga vendors sang Iloilo Central Market sa Iloilo City Government ilabi na kay Iloilo City Mayor Raisa Treñas bangod sa mga programa kag proyekto nga ginapatuman sang syudad para sa ila nga mga manugbaligya.
Sa interview sang Bombo Radyo kay Josefino Barroca, presidente sang Iloilo Central Market Vendors Association, iya ginpahayag nga lakip sa programa nga ginahatag sang syudad amo ang mga benepisyo sa ila negosyo kag pagpaayo sang kahimtangan sang merkado.
Pahayag pa sini nga ginahatagan man sang solusyon sang Iloilo City Government ang mga problema nila nga mga vendors.
Suno pa kay Barroca madamo naman sang pagbag-o sa merkado, nga suno sa iya, malayo na sa kahimtangan sini sang una, nga masami ginabaha kag may mga parte nga ginasudlan sang tubig kon nagaulan.
Subong suno sa iya, mas makita na ang kalimpyo kag mas maayo nga palibot para sa mga vendors kag manugbakal nga nagapaayo sang ila nga pagsinarayo.
