ILOILO CITY- Pat-ud nga mapasakaan sang kaso nga perjury ang duha ka mga testigo sa drug charges batok kay detained Senator Leila De Lima kasunod sang ila pag-retract sang ila statement.
Ini amo sanday self-confessed drug lord Kerwin Espinosa, nga nag-testify sa Senado sang 2016 batok kay De Lima; kag si former Burea of Corrections chief Rafael Ragos, ang star witness sang Department of Justice (DOJ) sa pending court cases batok sa senadora.
Si Espinosa ang nagsiling nga nag-imbento siya sang istorya tuhoy sa ila dealings bangud ginpahog siya sang pulis samtang si Ragos ang naghambal nga ginpwersa siya ni anay DOJ Secretary Vitaliano Aguirre.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga bangud under-oath sa korte ang affidavits sang duha, pat-ud nga madutlan sang kaso kag mapreso sanday Espinosa kag Ragos.
Suno kay Palomado, angot sa pagpasaka sang kaso, bangud makabig nga isa ka public crime ang nakumiter sang duha, bisan sin-o ang mahimo nga magpasaka sang kaso.
Ginpaathag naman sang abugado nga bangud nga wala na sang ebidensya batok kay De Lima, mahimo nga mag-file sang motion ukon demurrer to evidence ang kampo sang senadora agud mapamatud-an nga indi ini guilty sa kaso kag dalayon na ini nga mahilway.
