Nag-engkwentro ang mga rebelde kag militar sa Nalbang, Leon, Iloilo.
Sa interview sang Bombo Radyo Iloilo kay Lt Col. Joel Benedict Batara, commander sang 61st Infantry Battalion sang Philippine Army, iya ginpahayag nga antes pa man ginsulod sang militar ang kuta sang mga rebelde nga myembro sang Suyak Platoon sang Komiteng Rehiyon Panay-Southern Front Committee, may natabo anay nga engkwentro nga naglawig sang 20 minutos.
Suno kay Batara, ginsugid sang mga residente nga may nagapanago nga mga rebelde sa lugar.
Sang nagpatigayon sang operasyon ang militar, ginpalukpan sila sang indi magnubo sa 20 ka mga rebelde kag gilayon man ang mga ini nga nagpalagyo.
Narekober naman sa kuta sang mga rebelde ang (3) Bag packs, (2) Anti Personnel Landmines, (2) magazine sang cal .45, (1) magazine sang 7.62mm M14 nga may live ammunitions, Subversive documents kag medical paraphernalias.
Suno kay Batara, ang ginahimo nga pagpang harrass sang mga rebelde sa militar ang kabahin sang ila pagdumdom sa anibersaryo sang National Democratic Front (NDF) nga isa sa mga communist terrorist support groups sa maabot nga Abril 24.
Nagpanawagan naman si Batara sa mga residente nga ipahibalo sa mga otoridad kung may makit-an ang mga ini nga mga rebelde.
