Nagpanawagan ang lider sang North Korea nga si President Kim Jong Un nga pabaskugon pa ang produksyon sang mga missle kag artillery shell para masigurado sang pungsod ang ila nga gahum sa militar kag mangin handa sa posible matabo nga giyera.
Ginmandu ini ni Kim sang nagbisita siya sa key munitions factories nga nagahimo sang tactical missles, missle launch platforms, armored vehicles, kag artillery shells.
Ang iya nga field inspection amo ang latest sa sunod-sunod nga pagbisita niya sa mga pabrika sang armas kun sa diin iya man nga ginmandu ang mass production sini.
Ginhimo ini pila ka adlaw antes ang pag-umpisa sang joint military drills sang Amerika kag sang South Korea nga iya na una nga gintawag nga rehearsal para sa nuclear war.
Ginalauman nga himuon sang militar sang US kag South Korea ang ila nga Ulchi Freedom Guardian summer exercises subong nga bulan.
