Malapit na lang nga makaumpisa sa pag-operate ang molecular laboratory sang Iloilo Provincial Government nga nahamtang sa Iloilo Provincial Hospital sa Pototan, Iloilo.
Kaina sang aga, ginpatigayon sang inauguration sa nasambit nga molecular laboratory.
Lakip sa nagtambong sa inauguration amo si Department of Health Region VI Director Dr. Marlyn Convocar, Iloilo Governor Arthur Defensor Jr., Iloilo Vice Governor Christine Garin kag iban pa nga mga opisyal sang Iloilo Provincial Govenrment kag local government unit sang Pototan.
Suno kay Governor Defensor, nagakinahanglan pa sang license to operate halin sa Department of Health kag Research Institute for Tropical Medicine ang laboratoryo.
Sa gwa sang laboratory, may yara sang medical waste treatment facility agud mapagwa sang maayo kag safe ang mga infectious waste.
Suno pa sang gobernador, target sang laboratory nga maka-proseso sang 200 ka specimen kada adlaw.
Kun mangin operational na, ang facility ang ginalauman nga makapadasig sa pagpagwa sang COVID-19 results sa probinsya sang Iloilo kag sa iban pa nga kaiping nga probinsya sa Western Visayas.
Ang pagtukod sang laboratory ang ginpondohan paagi sa Bayanihan Grant to Cities and Provinces.
