Ginapahangop ni Iloilo Governor Arthur Defensor, Jr. sa publiko nga para sa kaayuhan sang kadam-an ang moratorium nga ginpapanaug sang pila ka mga banwa sa mga locally stranded individuals, returning overseas Filipinos, kag Authorized Persons Outside Residence subong nga holiday season.
Sa interview sang Bombo Radyo kay Defensor, iya ginpahayag nga katuyuan sini nga moratoriums nga punggan ang COVID-19 infection surge subong nga Disyembre.
Kun pahalugan ang pagsulundan sa Disyembre, Enero suno kay Defensor mabatyagan ang epekto kag kun magtaas ang kaso, posible nga magabalik ang probinsya sang Iloilo sa mas mataas nga quarantine classsification.
Matandaan nga una na ginpahibalo sang Regional Taskforce for COVID-19 nga lakip sa mga banwa nga indi anay makabaton sang mga LSIs subong nga holiday season amo ang:
Leganes, Iloilo – may moratorium sa Disyembre 21 tubtob Enero 1
Guimbal, Iloilo – may moratorium sa Nobyembre 30 tubtob Disyembre 14
Estancia, Iloilo – may moratorium sa Disyembre 1 tubtob Disyembre 13
Nagdugang diri ang banwa sang Concepcion nga may moratorium para sa LSI, APOR, kag ROF humalin Disyembre 10 tubtob Disymebre 24.
Kalabanan nga rason sang mga LGUs amo ang nagagutok na nga mga quarantine facilities.
