ILOILO CITY- Halos wala sang direkta nga impact sa MORE Electric and Power Corporation (MORE Power) ang padayon nga pagtimbuok sang presyo sang produktong petrolyo sa world market bangud sa Russia- Ukraine crisis.
Ini may kaangtanan sa ginapanan-aw sang Department of Energy nga pagtaas man sang presyo sang kuryente bangud sa oil price hike.
Sa interview sang Bombo Radyo kay Mr. Roel Castro, presidente kag Chief Operating Officer (COO) sang MORE Power, iya ginpahayag nga sa subong, konektado direkta sa National Grid Corporation of the Philippines (NGCP) ang tanan nga substations sang MORE Power.
Suno kay Castro, nagakahulugan ini nga 100 percent sang ginakinahanglan sini nga power supply ang nagahalin sa Power Sector Assets and Liabilities Management (Psalm) Corporation nga naga-operate sang geothermal plant sa Leyte nga naga-produce sang renewable energy.
Ginpahayag ni Castro nga subong nga tuig, wala man sang nakakontrata nga oil- based plant agud mag-supply sang kuryente sa MORE Power.
