ILOILO CITY- Nagpasalig ang MORE Electric and Power Corporation nga wala sila sang patigayunon nga preventive maintenance activity tubtob sa Mayo 31 sa Iloilo City.
Ini kasunod man sang hingyo ni Iloilo City Mayor Jerry Trenas sa MORE Power nga kon mahimo,malikawan ang power interruption sa syudad samtang napaidalom ini sa Modified Enhanced Community Quarantine nga kalabanan sa mga pumuluyo ang yara lang sa ila mga balay.
Sa interview sang Bombo Radyo kay Engr. Leomel Tambanillo, head sang Power Sytem Planning and Design sang MORE Power, iya ginpahayag nga may direktiba si Mr. Roel Castro, Presidente sang MORE Power, nga suspended ang tanan nga preventive maintenance activities.
Suno kay Tambanillo, kon may yara naman sang matabo nga hinali lang nga power interruption, yara ang emergency response team nga nagaalerto 24 oras kada adlaw para nga makaayo gilayon ang problema.
Nagapakig-angot man sila sa mga ospital agud nga sa tion nga may matabo nga wala ginalauman nga power interruption, masolosyunan gilayon kag indi maapektuhan ang sensitibo nga mga trabaho sa ospital.
