Wala nakatambong sa ginpatawag nga imbestigasyon sang Land Transportation Office (LTO)ang vlogger nga si Yanna.
Ginpatawag ang nasambit nga vlogger matapos ang pagka-involve niya sa road rage incident sa Zambales.
Sa baylo nga magtambong, ang abogado na lamang sini ang nag-atubang para sabton ang show cause order sang LTO.
Ginpahayag ang iya nga legal counsel nga ginpakamaayo sang iya nga kliyente nga si Alyana Mari Aguinaldo nga indi magtambong bangud sa iya pagkabalaka para sa iya nga seguridad.
Gin-alegar nga nakabaton ini sang pamahog sa kabuhi humalin sang naglapta ang nasambit nga video.
Sa iya nga ginpadala nga sulat sa LTO, nagpangayo ini sang pasaylo sa driver sang pick-up kag mangin sa pamilya sini kag sa mga tawo nga naapektuhan sa iya nga batasan.
Handa man ini nga batunon ang ano man nga silot nga idagdag batok sa iya sang LTO.
Ginpahayag ni LTO chief Atty. Vigor Mendoza, nga ginmanduan niya ang abogado ni Yanna nga isurrender ang driver’s license matapos nga inisyal na gindagdagan siya sang 90-day preventive suspension samtang padayon ang imbestigasyon.
Sa masunod nga hearing sa Mayo 8 , indi lang ang lisensya sini ang ginapa-surrender kag mangin ang motorsiklo nga gin-gamit nga wala nakarehistro sa iya nga pangalan sang nagluntad ang insidente.
Matandaan nga ginlutsan sang vlogger ang pick-up driver samtang yara sila sa lubak-lubak nga dalan sa Zambales kag matapos nga ginlutsan, ginhatagan pa niya sang ‘dirty finger’ ang driver bag-o ginkompronta.
Mismo ang kaupdanan ni Yanna ang nangayo sang pasaylo sa driver sang amo nga tion samtang wala naman nag-sorry ang babaye nga vlogger.
