ILOILO CITY- Temporaryo anay nga indi makabyahe ang MV Maria Wynona nga ginapanag-iyahan sang Montenegro Shipping Lines matapos nga nagsadsad ini sa Brgy. Bacay, Dumangas, Iloilo.
Sa interview sang Bombo Radyo kay Ensign El John Ga, Commander sang Coast Guard Station Dumangas, iya ginpahayag nga base sa ila pagpangusisa, nagsala sa pagkalkula ang kapitan sang barko bangud nga pila ka adlaw pa lang ini nga nagabyahe sa ruta nga Dumangas, Iloilo to BREDCO port, Bacolod City and vice versa.
Suno kay Ga, isa man sa mga rason amo ang mabaskog nga balod sang amo nga tion.
Ginpahayag ni Ga, sa tion nga matapos ang assessment sa barko kag masigurado nga sea-worthy na ini, tugutan man nga magbalik na ini sa pagbyahe.
Nahibaluan nga sakay sang barko ang 161 ka mga pasahero sang ini ang nagsadsad apang wala man sang may nasamaran.
Mismo ang sister ship sang nasambit nga sea vessel ang nagbulig agud mapadungka ini sa Dumangas port.
