Ginkumpirma sang Office of Transportation Security nga magapangatubang sang kaso-administratibo kag kaso-kriminal ang isa ka security personnel sa Ninoy Aquino International Airport Terminal 1 nga nadakpan sa video nga naghamal sang kuwarta nga ginapahayag ginkawat sini sa isa ka pasahero.
Suno kay OTS administrator USec. Mao Aplasca, gilayon na nga na-relieve ang amo nga babayi nga personnel kag ipaidalom ini sa preventive suspension samtang nagapadayon ang imbestigasyon.
Septyembre 8 sang natabo ang insidente apang Septyembre 14 lamang sang na-secure ang closed-circuit television camera footage.
Ginapahayag nga nagdangat sa $300 ang nadula nga kuwarta sa isa ka Chinese passenger sang amo nga tion ukon katumbas sang ginabanta P17,000.
Base naman sa footage, makit-an ang personnel nga naga-usang sang papelon nga kuwarta, nag-inom sang tubig, kag nagkuha pa sang iya nga panyo agud pahiran ang baba. Ginhimo niya ini samtang naga-atubang gid mismo sa camera kag nagapakadto-pakari pa ang mga tawo sa iya palibot.
Suno kay Aplasca, tubtub subong, nagapamalibad ang babayi nga ginkawat niya ang kuwarta apisar nga may mga naka-plastar na nga mga ebidensya.
Magluwas sa nasambit nga screening officer, dal-on man sa imbestigasyon ang tanan nga assigned sa amo man nga posisyon.
Matandaan nga sa temprano nga bahin sini nga tuig, may mga personnel man ang OTS nga involved sa gina-alegar nga extortion incident. #
