ILOILO CITY – Nagapangampo sa kakapoy si Iloilo City Mayor Jerry Treñas sa mga ginahimo nga ‘pagpabudlay sang national government agencies sa local government units’ may kaangtanan sa mga ginapatigayon nga lihok batok sa coronavirus pandemic.
Sa interview sang Bombo Radyo kay Treñas, iya ginpahayag nga daw kaangay nga nagapirma lang ang mga opisyal sa ibabaw sang memorandum circular apisar ‘wala sang ihibalo’ kun ano ang matuod nga nagakatabo kag nagaka-eksperyensyahan sa mas manubo nga lebel kaangay sa syudad sang Iloilo.
Ini ang pahayag sang alkalde matapos nga madamo ang requirements nga ginpapanaug sang Department of Education DepEd) kag Department of the Interior and Local Government (DILG) agud mahimo nga isolation facility ang mga eskwelahan sa syudad, partikular na ang Iloilo Central Elementary School (ICES), para sa mga Persons Under Investigation (PUIs) kag Persons Under Monitoring (PUMs).
Suno kay Treñas, lakip sa mga ginapangayo amo ang certification nagikan sa iya nga nagapamatuod nga wala na gid sang mahimo pahamtangan sang amo nga mga pasyente nga subong ginakabalak-an nga ang kondisyon naangot sa coronavirus disease 2019 (COVID-19).
May yara man sang gina-require nga Memorandum of Understanding (MOU).
Sobra sobra na suno kay Treñas kun kinahanglan pa niya nga magluhod agud lamang nga mapa-tinir ang amo nga mga pasyente sa nasambit nga isolation facility.
Bangud sini, nagdesisyon ang Iloilo City Government nga sayluhon na lang ang mga PUMs sa Iloilo City Jubilee Hall.
Ang ikaduha kag ikatatlo nga panalgan sang Iloilo City Jubilee Hall suno kay Treñas ang sarang maka-akomodar sang 50 tubtob 70 ka PUMs — samtang ginatuman man ang social distancing measure.
Mas maayo kuntani suno kay Treñas ang ICES, bangud indi na kinahanglan nga magsaka-panaug ang mga tawo, ilabi na ang mga tigulang nga mahimo may maluya na nga lawas.
Kaangot sa kun bala magapakig-angot siya sa presidente agud nga ipaalinton ang iya kalain sang buot sa national government agencies, ginpahayag ni Treñas nga magasunod na lamang siya sa mandu sang amo nga ahensya bangud nakapoy na siya.
Suno sa alkalde, gina-focus na lamang niya ang iya atensyon sa mga pribado nga sektor kag iban pa nga tawo nga nagabulig sa mga tawo sa syudad.
