Siling nila, kun single ka kag daw wala ka gid sang hakson-hakson, no problem bangud “you can hug a tree!”
Ina bangud base sa pagtuon, ang pagkupo sa puno sang kahoy ang nagapasaka sang lebel sang hormone nga responsable para sa pagkalma kag para sa emotional well being sang isa ka tawo. Mahimo man ini makapanubo sang blood pressure kag heart rates, maka-improve sang immunity, kag maka-buhin sang stress kag anxiety levels.
Apang may isa ka tawo nga tumandok sang Ghana nga indi lang isa ka puno ang iya ginhakos kundi lapaw sa 1,000 sa sulod lamang ina sang isa ka oras!
Ini amo si Abubakar Tahiru, 29, nga nagatuon sang forestry sa Alabama nga nagtuyo nga maka-set sang world record paagi sa pagpanghakos sang mga kahoy sa Tuskegee National Forest.
Halin sang bata pa siya, interesado na siya sa nature conservation rason nga nagpadayon ini sang iya nga master’s degree sa forestry sa Auburn University.
Para sa iya nga record attempt, required si Tahiru nga kup-an gid sang duha ka kamot ang puno kag dapat siguruhon nga indi ma-damage.
Indi man dapat pagsuliton hakos ang isa ka kahoy rason nga grabe ang speed ni Tahiru para makumpleto ini sa isa ka oras.
Sang amo pa nga tion, nagapuasa si Tahiru gani nga isa pa ini ka pagpanghangkat sa iya kag tuman ang kakapoy.
Sa average nga 19 ka kahoy kada minuto, nalapawan sini ang minimum requirement nga 700 ka kahoy agud maka-establish sang record bangud nagdangat sa 1,123 ka kahoy ang iya nahakos.
Ini nga record ang nagapasaka pa sang awareness kag importansya sang kahoy kag environmental conservation ilabi na subong nga tuman ka init ang tyempo.
