Ginabantayan ang mangin adjustments sang San Antonio Spurs subong nga season matapos nakumpirma nga indi na makahampang ang ila young superstar nga si Victor Wembanyama.
Sang damlag lang, ginpapag-on sang franchise ang ila nga roster sang nakuha si De’aron Fox halin sa Sacramento Kings sa isa ka blockbuster trade. Ini nga point guard ang may average nga 21.6 points, 7.8 assists, kag 1.8 steals sang nag-upod sa San Antonio.
May star potential man ang rookie standout nga si Stephon Castle nga amo ang No. 4 overall pick sa 2024 NBA Draft.
Base sa kumpirmasyon sang Spurs, na-diagnose si Wembanyama nga may deep vein thrombosis nga isa ka porma sang blood clot sa iya tuo nga abaga.
Ang 21-anyos nga reigning Rookie of the Year ang may impresibo kuntani nga season kag nahingadlan nga All-Star sa labing-una nga tion sa iya karera.
Ini nga French forward-center nga may average nga 24.3 points, 11 rebounds kag 3.7 assists sa 2024-25 NBA season.
Sang Nobyembre 2024, nalab-ot sini ang career-high nga 50 points batok sa Washington Wizards. Bangud sadto, naplastar ang iya pangalan bilang fourth-youngest player sa NBA history nga nalab-ot ang amo nga achievement.
Antes ang injury, frontrunner man kuntani si Wemby para sa Defensive Player of the Year award, apang mangin ineligible na ini sa award bangud indi sini makumpleto ang gina-require nga 65 games.
