ILOILO CITY– Maga-request ang National Bureau of Investigation (NBI) sang court appointed physican agud mag-usisa sa matuod nga medical condition ni Janiuay Iloilo Mayor-elect Frankie Locsin.
Nahibaluan nga naka hospital arrest sa gihapon si Locsin matapos gin-aresto sang NBI samtang nagakuha ini sang clearance matapos natukiban nga convicted ini sa kaso nga pagalapas sa Anti-Graft and Corrupt Practices Act.
Sa exclusive interview sang Bombo Radyo Iloilo kay Atty. Raul Quinto, assistance regional director sang NBI Region 6, iya ginpahayag nga magapadala sila sang sulat sa pamunuan sang The Medical City agud matumod kun bala maayo na ang kondisyon ni Locsin matapos ginapahayag gulpi lang nagsakit ang iya dughan sang ginkuhaan sang mug shots kag hana na kuntani nga dal-on sa Sandiganbayan.
Suno kay Quinto, sa bulig sang court appointed physican, mahibaluan kun bala ‘fit to travel’ na si Locsin agud dal-on sa Sandiganbayan.// Matandaan nag-ugat ang kaso bangud sa pagbakal sang banwa sang Janiuay sang P15 million nga balor sang bulong halin sa Priority Development Assistance Fund (PDAF) ni Sen. Vicente Sotto III sang tuig 2001.
Ang medical supply contract ang gin-award sa AM Europharma, sa diin ang ila accreditation ang ginsuspend sang Department of Health (DOH).
Magluwas kay Locsin gin-convict man sang Sandiganbayan sanday municipal accountant Carlos Moreno Jr., budget officer Ramon Tirador, treasurer Luzviminda Figueroa, Ricardo Minurtio, kag Rodrigo Villanueva.
Ginpamatbatan man sang anti-graft court ang mga natungdan sang anom tubtub 10 ka tuig nga pagka preso kag ginpapanaugan sang perpetual disqualification from public office.
