Nagapangabay ang National Grid Corporation of the Philippines (NGCP) nga indi magpalupad sang burador malapit sa mga mga transmission line, mga tower, mga substation, kag iban pa nga mga power facility.
Pananglitan magsangit ang burador sa linya sang kuryente, mahimo ini mag-resulta sa power interruption nga daku nga huol ilabi na subong nga summer season.
Sa interview sang Bombo Radyo kay Mr. Reagahn Alcantara, lead specialist sang NGCP, iya ginpahayag nga tuigan na nila nga ginakampanya ini, apang may yara gihapon nga mga kaso sang brownout nga burador ang rason.
Ginhingyo sini sa mga ginikanan kag local government units (LGUs) nga giyahan ang kabataan agud matuman ini nga hingyo.
Kun magsangit ang burador sa power lines ukon kun magsulod sa substation, mahimo ini maka-resulta sa pag-trip sang linya, unscheduled power interruptions, damage sa equipment, kag risgo sa safety sang mga tawo.
Ginpahanumdom man sang grid corporation nga ang pagpalupad sang burador malapit sa power facilities ang nagalapas sa Republic Act 11361 ukon ang Anti-Obstruction of Power Lines Act.
Ini nga layi ang nagatuyo nga proteksyunan ang transmission corridors kag iban pa nga kritikal nga electrical infrastructure. Tuyo man sang layi nga malikawan ang mga aksidente kag disruptions sa power grid.#
