Nagdangat na sa 112 ka mga kapulisan ang nagpositibo sa Coronavirus Disease 2019 matapos nga madugangan sang tatlo ka panibag-o nga kaso.
Suno sa Philippine National Police Health Service, base sa naggwa nga resulta gikan sa Research Institute for Tropical Medicine ang tatlo ka panibag-o nga kaso ang ginalakipan sang 48-anyos nga lalaki nga officer gikan sa Parañaque City, 29-anyos nga lalaki gikan sa San Juan City kag 32-anyos nga lalaki kag nakadestino sa National Captial Region.
Sa pihak sini maayo naman nga balita ang pagrecover snag 17 ka mga police officer samtang 92 naman ang active cases nga ginpaidalom na sa supportive healthcare.
Ginatutukan na sang Philippine National Police Health Service ang 310 ka mga personnel nga yara sa kategorya nga probable cases samtang 384 naman ang ginakabig nga suspected cases.
Sa subong 1,063 na ka mga PNP personnel ang nakatapos na sang ila home quarantine nga nagpaidalom man sa strict monitoring kag medical observation.
