Lima na ang kumpirmado nga patay sa probinsya sang Capiz bangud sang lapnagon nga pagbaha nga dala sang Bagyo Ramil.
Sandig sa data sang Provincial Disaster Risk Reduction and Management Office (PDRRMO), ang mga ginbawian sang kabuhi amo sanday Rizaldo Balgos, 44 anyos sang Barangay Dinginan, Roxas City kag Mary Mae Urdelas, 22 anyos nga content creator sang Barangay Malocloc Sur, Ivisan nga pareho nga napatay bangud sa pagkalunod.
May isa naman ka lalaki nga nakuryente sa Barangay Dulangan, Pilar.
Magluwas sa ila, may duha pa ka mga indibidwal nga na-report nga napatay sa Roxas City.
Sa latest report sang Bombo Radyo Roxas halin sa data nga ginsumite sang awtoridad, nagdangat na sa 17,418 ka mga pamilya ukon katumbas sa 61,305 ka mga indibidwal ang apektado bangud sa lapnagon nga pagbaha.
Kahapon, Oktubre 18, sang gin-anunsyo nga ginpaidalom na ang Roxas City sa state of calamity sa idalom sang Resolution 263-2025 nga gin-aprubahan sang city council paagi sa special session.
Sa sini nga resolution, gina-invoke ang probisyon sang Local Government Code of 1991 kag Republic Act 10121 ukon ang Philippine Disaster Risk Reduction and Management Act kun sa diin ginahatagan sang awtoridad ang local governments nga magdeklarar sang state of calamity agud nga mapadasig ang relief, recovery, kag rehabilitation efforts.#
