Ginkwestyon kag ginpakamalaot ni Senate Pres. Alan Peter Cayetano ang Senate minority bloc bangud daw kaangay suno sa iya nga gina-una pa sang mga ini ang pulitika kag ang 2028 elections ipaanggid sa seguridad kag kabuhi sang ila kaangay nga mga senador.
Ini kasunod sang insidente sang pagpalupok sang pusil sa sulod sang Senado sang Miyerkules, Mayo 13.
Suno pa kay Cayetano nga kaangay mas nakatutok pa ang iban nga miyembro sang minorya sa isyu sang Senate presidency kag sa nagahilapit nga eleksyon sa 2028 sa baylo nga tutukan sang mga ini ang seryoso nga natabo sa sulod sang Senado.
Dugang pa sang Senate President, posible nga may panibag-o naman sa liderato sang upper chamber sa Lunes, Mayo 18.
Ini bangud una na sini ginpahayag nga masako ang minority sa pag-istorya sa iban nga myembro sang majority agud nga updan sila sa panibag-o nga kudeta.
Sandig sa nagalapta nga reports, nagaguwa ang pangalan ni former Senate President Juan Miguel “Migz” Zubiri nga amo ang possible nga i-eleher liwat sa pwesto sa Lunes.
Matandaan nga isa si Zubiri sa duha nga nag-abstain kadungan sang binotohay sang Lunes sang hapon.
Si Zubiri amo ang una nga Senate President sa idalom sang administrasyon ni President Ferdinand Marcos Jr., antes natabo ang kudeta kag gin-islan siya ni Chiz Escudero sang 2024.
