Naglab-ot na sa 53 ang numero sang napatay bangud sa magnitude 7.8 nga linog nga nag-igo sa Mindanao suno sa Bureau of Fire Protection (BFP).
Suno kay BFP spokesperson Fire Superintendent Anthony Arroyo, 53 ka bangkay ang na-retrieve base sa report nga nabaton sang ila nga Emergency Operation Center.
Pahayag pa sini nga may pila ka bangkay nga wala pa makilal-i kag napaidalom pa ang mga ini sa beripikasyon.
Mas mataas ini kumpara sa nauna nga report sang National Disaster Risk Reduction and Management Council (NDRRMC) kun sa diin 45 na ang kumpirmado nga napatay.
Nagapabilin nga Case Red ukon full alert status ang BFP sa Rehiyon sang Davao kag SOCCSKSARGEN samtang nagapadayon ang pagsabat sang mga awtoridad sa epekto sang linog nga nagluntad.
Naglab-ot naman sa 3, 441 ang mga myembro sang BFP ang naka-standby sa duwa ka rehiyon agud nga maghatag sang bulig.
Suno sa Office of Civil Defense (OCD) mabudlay sa gihapon ang pagsulod sa pila ka mga lugar bangud sa naguba nga mga kalsada kag iban pa nga imprastruktura ilabi na sa SOCCSKSARGEN.
