ILOILO CITY- Nag-deploy ang Office of Civil Defense (OCD) sang water filtration truck nga may seven-man Rapid Deployment Team sa Negros Occidental agud masiguro ang tayuyon nga suplay sang matinlo nga mainom nga tubig sa mga lugar nga apektado ng paglupok sang Bulkang Kanlaon.
Sa interview sang Bombo Radyo Iloilo kay Raul Fernandez, Regional Director sang Office of Civil Defense Region 6, iya ginpahayag nga ang water filtration truck kag ang team ang naghalin pa sa Manila kag gindala sa Bacolod Port Area sa bulig sang Philippine Coast Guard (PCG), Philippine Ports Authority (PPA), kag Philippine Navy.
Suno kay Fernandez, ang Rapid Deployment Team ang magahatag sang water filtration services sa mga evacuees halin sa La Carlota City kag La Castellana.
Una na nga naghatag ang ahensya sang 4,000 pieces sang N95 face masks sa Negros Occidental agud malikawan nga mahaklo sang mga residente ang asupre halin sa bulkan.
As of June 10, kabilugan nga 29,137 nga mga indibidwal ukon 8,479 nga pamilya sa Western Visayas kag Central Visayas ang apektado sang paglupok sang bulkan.
